سبع أقلام

    - هو انت ليه ما بتحكيش لما بتبقى مضايق عن احزانك وديما تكلمنى عن احلامك  ؟؟؟-!!!

     _لا عادى اصلى شايف ان احزان الناس كلها متشابه

    وحكى لحزنى هيبقى فيه شيىء من التكرار والملل .

    عارفه لو احلام الناس هى الى متشابهه واحزانهم المختلفه كانت هتفرق مع البشرية كتييييييير .

    أوعدك لو ده حصل ..هحكى وقتها .

#حوار 1 (القلم الأول )
------------------------------------------------------------------
 - هو ليه كل ما اكلمك عن الحب .. تكلمنى عن الحرية والجمال والحق ؟؟

_ كلها مهدئات ومسكنات ، وكل واحد بياخد المهدء الى بيريحه

وما تخفيش انا ما عنديش حساسية ضد مركبات الحب ، بس الحرية والجمال والحق بتعملى دماغ اعلى مش اكتر .


#حوار 2 (القلم التانى )
------------------------------------------------------------------

- من فترة مش بتحكيلى عن نفسك .. ايه السبب ؟؟!! يمكن انا السبب ؟؟

_ لا يا ستى وبطلى تغلطى الغلطة الى غلطها زمان وافتكرت انى محور الكون .. وان الكون ده لو وقف عن الدوران هبقى لانى مش موجود .

- طيب ليه مش بتحكيلى عن نفسك ؟؟

_ لسببين الأول قولتهولك من شوية

- طيب والتانى ؟؟؟

_ كويس اهيه اغنية فيروز اشتغلت فى وقتها اسمعى

كل ما الحكي يطول اكتر بتقول بتصير معقول"

بتحكي الصحيح ..

كل ما الحكي يطول اكتر بتقول بتصير معقول

بتحكي تمام ..

كل ما الحكي يبان و لو كيف ما كان بتصير انسان

حكيه صريح ..

كل ما الحكي يبان و لو كيف ما كان بتصير انسان

طالب سلام "

#حوار 3 (القلم التالت )
------------------------------------------------------------------------

- ديما ما مش بفهمك لما بتقول " بتحب الخريف اكتر من الربيع "؟؟

_ هو انا قولتلك الموضوع ده قبل كده ؟؟

- اه وكلمتنى عن الشتا كمان .

_ أفتكرت...

الموضوع ببساطه ان الخريف بيبن كل حاجه على اصلها بعد ما الورق بيدبل والنفوس بتقلع الاقنعه الى عليها .. وتشوف جزء كبير من الحقيقة .

الربيع مش كده

الربيع بقى موسم التزيف الى .. حاجه حلوه تدخل فى حاجه وحشه ويبان كلهم لوحه واحده من بعيد.. شكلها حلو وجميل بس لما تقربى تلاقى الورد حوليه شوك .

عشان كده بسميه موسم ارتكاب الحمقات .. موسم التزاوج يعنى .

- طيب الشتا ؟؟

_ الشتا هو الموسم الى بيجى يغسل اثار كل المواسم التانية .. والنفوس كمان.

#حوار 4 (القلم الرابع)

---------------------------------------------------------------------

- النهارده قفشتك وانت فاتح علبة القهوة وقاعد تشم فيها حوالى 5 د .. انا اعرف أنك بتحب تشم اول فتحه للقهوة .. انما اول مره اشوفك بتشم فى قهوة قديمة ..ده ادمان ده ولا ايه ؟؟؟!!

_ ولا ادمان ولا حاجه .. كنت بعمل فنجان قهوة

شميت ريحتها القديمة المقفولة فى العلبه ديه عارفها ؟؟؟

- اه :)

_ لقيت انها تشبه ريحة خزنة جدتى .. كانت بتحط فيها حاجات الخياطة وكده ...الغريبه انى افتكرت تفاصيل العمر ده كله فى الخمس دقايق

ممكن ما تصدقنيش ... بس الريحة بقت مرتبطة معايا بالذكريات اكتر من الصور والصوت .

تعرفى ان اوقات بفرح لما بيضربوا غاز عشان بتفكرنى بالى حصل و ليه انا شاركت من الاول ... بتفكرنى ان كنت ماشى على الطريق ولا .

#حوار 5 (القلم الخامس)


------------------------------------------------------------------------
- ايه اكتر حاجه بتحبها فى حياتك ؟؟
_ مع انى ما بحبش الأسئلة المطلقة ديه .. بس ممكن أقولك ان ضحكه او ابتسامه صافية من القلب .. أكتر حاجه ممكن تسعدنى فى الحياة .

- أظن كده يبقى اكتر حاجه بتكرها فى حياتك التكشير يا سم ؟؟
_ لا مش التكشير يا سم .. أكتر حاجه بكرها فى حياتى هى الظلم .

-الظلم !!تقصد ايه بالكلمة ديه ؟؟
_هقولك أصدق تعريف للظلم قريته مره من عمنا بهاء طاهر ..بس هو فى كلامه بيتكلم عن الشر وانا اقصده بالظلم على العموم الاتنين واحد عندى .

- كان ايه التعريف ؟؟
_" قهر الإنسان بالفقر وقهره بالخوف، وأهم من ذلك قهره بالجهل.
أن يعيش الإنسان ويموت دون أن يعرف أن فى الدنيا علماً فاته وجمالاً فاته وحياة لم يعشها أبدا"
هو ده الظلم بالنسبه ليا

- كتير بحس انك متأثر ب بهاء طاهر ؟؟
_ حاجه ما انكرهاش اول من طرح الفكرة عندى

- فكرة ايه ؟؟
_ كن انسان وكفى .

#حوار 6 (القلم السادس)


---------------------------------------------------------------------

_ تعرفى من كام يوم كنت ناشر حاجه عن حقوق الانسان وكده .. واحد كتب تعليق :

"انت زى ما انت من سنتين ما اتغيرتش  نفس الموضوع الى اختلافنا عليه.. وانت تقول ان البلطجى له حقوق اول ما يتمسك "

صحيح هو انا ما اتغيرتش فعلا ؟؟

- لا يا سيدى انت اتغيرت بدليل انك اول مره تفتح الحوار.. و أول مره انت الى تسأل .. تعرف انى كل يوم اول ما بروح بسجل الحوار الى دار بينا ..بحاول احتفظ بكل لحظة .. الله اعلم الموضوع ده هيدوم لامتى  .

_مش عايز اضيع لحظات السعادة ديه عليكى ..بس انتى شايفه انى اتغيرت فعلا ؟؟ .. طيب لو قولتلك انى قاعد بتكلم معاكى من سبع ايام وانا مرغم ؟؟

- ازاى يعنى .. مش فاهمه ؟؟!! حد ماسكك ؟؟

_ محدش ماسكنى ولا حاجه بس انتى تعرفى عنى انى بمل من الحاجات بسرعه .. بمل من الكلام ومن الحب والضحك والدراسة والشغل و الألوان والحياة احيانا ..صح ؟؟

-ايوه صح .. ماهو ده الى مخلينى اقولك انك اتغيرت ..طيب لو فعلا انا فاهمة غلط وانت زى ما انت ..ايه الى  مخليك تتكلم معايا ل سبع ايام متواصله ؟؟؟؟!!!!

_رهان ...

-نعم ؟؟!!

_ايوه رهان ..اتراهنت مع صديق ليا انى هستحمل اقعد اصارحك لمدة سبع ايام من غير ما امل ..حاجه كده زى السبع اقلام ... والنهارده اليوم السابع والحمد الله ما خيبتش ولا قلم .

#حوار 7 (القلم السابع )

Posted in: