كش ملك يا.....
أحبيني ..
بعيداً عن بلاد القهر والكبتِ ...
بعيداً عن مدينتنا التي شبعت من الموتِ ..
بعيداً عن تعصبها ..
بعيداً عن تخشبها..
أحبيني .. بعيداً عن مدينتنا
التي من يوم أن آانتْ
إليها الحب لا يأتي
كانت ديه الابيات المفضلة عندى من قصائد نزار قبانى , وبالرغم من براعة نزار فى التلاعب بالالفاظ وحبى للابيات ديه , كنت بختلف معه احيانا.
لانه من المستحيل ان يقضى القهر والكبت على الحب...لان الحب هو الى يقضى على القهر والكبت, والى بيرحل القهر والكبت مش الحب.
بس بعد ما شوفت وسمعت قصة " عمر المغربى" , اعترف بسذاجتى وعبطى وعدم فهمى للطبيعه البشريه.
لقد اطلعت على قصته و شاهدت كما شاهد الجميع احداث منها ولكنى اتيت متاخراً على العرض فرأيت اجزاء من النهايه التى لم يوضع لها تتر حتى الان ومازلت تكتب .. وبتتكرر كل يوم ومع اشخاص مختلفه.
سوف اطلعكم على ما اطلعت عليه ,و اروى لكم ما عاصرت بنفسى من القصه وادعكم للحكم بانفسكم.......لا ليس بنفسكم بل بقلوبكم.
بداية معرفتى بقصته كانت من خلال خالى , روى ليا قصة جاره عمر فى ليلة من ليالى ديسمبر 2010 .
قالى لى:..
انه احد ابطال احد الحروب الكثيره التى مرت بها البلاد خلال فترة ماضيه, لقد تطوع فى الجيش قبل استكمال تعليمه و استمر عدة سنوات فى الجيش قبل ان يكمل العشرين من عمره وتم تكريمه على ما قام به من اعمال بطوليه خلال فترة الحرب...ثم تم اعفائه من الجيش وقرر استكمال تعليمه الجامعى فى كلية الاداب.
لا اعرف هل كانت مبالغه من خالى لأضافة بعض التشويق على القصه ام هى فعلا الحقيقه : ان عمر كان متفوق جدا وكان الاول على دفعته بل زاد على ذلك انه كان يجيد عدة لغات فى هذا الوقت وكان شخص عبقرى يتمتع بخفة الظل والادب وحسن الهيئه يشبه ابطال الافلام العربى كده.
لم اناقشه فى صحة التفاصيل من كدبها لان ما يهمينى هو الحكايه ككل, لانى ما رأيته من هيئة عمر فى تلك الليلة اصابنى بالذهول وقررت انا اعرف اكثر عن قصته
اينعم قابلته فى نفس الليلة التى بدء فيها خالى قصته
لسه فاكر المشهد نزلت انا وخالى نصلى الفجر ,بعد الصلاة كان الجو مغرى جدا للمشى فى جو شبه ممطر ولسعة برد , اذكر ان خالى كان بيكلمنى عن تاريخ المنطقه و انها كانت منطقه مهجوره والان اصبحت بعد انتشار العمران منطقه حيويه جدا داخل المدينه وانا افتكرت كلام احد حكماء مصر اننا زدنا فى العمران وقلينا اوى فى التحضر , ولكن خالى قطع كلامه صوت عالى ,صوت رجل يسب ويلعن فى كل شيىء حوله من اول قطط الشوارع نهاية بالدوله ونظامها , لم يترك شيىء لم يلعنه فى المسافه القصيرة التى كانت تفصل بينه وبيننا.
ذهلت من كمية اللعنات المنطلقه من فمه وبصيت لخالى متسائلا , لم يجد الوقت الكافى للرد على نظراتى لان الشخص كان قد اصبح امامنا مباشرة , عندما وصلنا له , صدمت لأنه القى السلام على خالى.
ردينا السلام , ولكنه اضاف الى سلامه سؤال خالى عن حاله ولم ينتظر الاجابه وذهب......
شعرت وقتها ان هذا الشخص فى قمة الحكمه.
و دار فى ذهنى سؤال:
ليه بنسأل بعض عن الحال ونستنى ديما إجابه مختلفه عن كلمة الحمد لله , يمكن لو مافيش كلمة الحمد لله هتبقى فى مشكله هيقولك عليها, يمكن فعلا بقينا نحب نسمع مشاكل الناس من باب التهوين عن مشاكلنا .
أعجبنى اوى موقف عمر من هذا الموضوع ....بس بعد ما افتكرت كم السب واللعنات تراجعت عن فكرة انه فى قمة الحكمه .
من الواضح ان خالى اعتاد على هذا الموقف لأنه لم يصدم.....قاللى اهه ده عمر الى كنت بحكيلك عنه من شويه.
كان الفضول قد زاد عندى لأعرف السبب الى وصله الى هذا الحال.
ولكنى قبل ان اسأل قال لى خالى :
هكملك قصته ........
بص يا سيدى عمر زى ماقلتلك كان شاب ناجح اوى , اتخرج بأمتياز ,اتعين معيد و اخد الماجيستير, حصل على منحه للسفر الى إنجلترا للحصول على الدكتوراه كل الاحداث دي فى وقت قياسي.
يمكن تكون المنحه دي نوع من انواع التكريم من الدوله له على بطولاته فى الحرب -كما فعلت مع كل ابطال الحرب واهالى الشهداء بالمناسبه - زائد تفوقه الواضح .
اكمل قائلا:
انا فاكر انه سافر لندن بعد بدء محادثات السلام مباشرة ......
الغريب ان حتى فى رسايله الى بعتهالى وقت توقيع المعاهده ما اتكلمش عنها مع انه كان مهتم اوى بالموضوع ده قبل ما يسافر مش عارف ليه يمكن كان شايف انه عمل الى عليه فى الحرب والباقى عليهم .
وما علقش على هذه المحادثات الا من خلال سبه ولعناته الى بيرددها طوال ساعات الليل دلوقتى , ديما على لسانه باعوا دمنا ولاد الكلب .
قلت له مقاطعا : نعم!!!!! رسايله لك؟
ضحك خالى وقالى وهو كلامه بيقطع من كتر الضحك :
انا ماقلتلكش الى سلم علينا من شويه ده كان اعز صديق ليا زى ما بتقولوا كده انتيمى ..شقى يعني.
استمر فى الضحك وانا فى حالة ذهول واستغراب منه لانه ماقليش على معلومه زى دي.
كمل كلامه بعد توقفه عن الضحك وبدأ فى وصف ما حدث له فى لندن
الغريبه فى عمر انه عكس ناس كتير فى اول سنه غربه مكنش عنده مشاكل وتأقلم بسرعه على الجو هناك والحياة , وده كان واضح اوى فى اول رسايله وكان بيوصفلى اد ايه هو مبسوط هناك عكس ناس كتير اوى بتعانى فى بداية غربتها, فى الرسايل الى بعد كده اكتفى بالسلامات والسؤال عن احوال الناس..........هههههههههههه
بدا يضحك من جديد من نظرة الاستعجاب الى بانت على وشى ؟؟؟.
جاوب خالى السؤال الى بيدور فى دماغى , قالى هو كان غير كده اكيد يعنى وكان بيحب يسأل عن الناس من باب التواصل الى هو مقطوع عنه بحكم غربته.
كنا وصلنا للقهوة ...ولقيت خالى بيقولى تعالا نقعد ونكمل كلامنا , طلب خالى لنفسه الشيشه المعتبره وعرض عليا يطلبلى شيشه من باب الاختبار, بس انا رفضت وفضلت فنجان قهوة.
بعد ما القهوجى مشى
لقيت خالى بينتشلنى من التفكير والسرحان وبيقولى :
نرجع لموضوع الرسايل ,بعد اول سنة اتغيرت رسايله..حسيت فيها بفرح وانبساط و راحه , بعد كده بدء يحكيلى عن العائله الى اتعرف عليها فى لندن و كانت عائلة مهندس قبطى عايش فى لندن من وقت طويل وعنده بنتين ......مريم ومريان
برغم الانبساط الواضح فى رسايله الا ان انا مكنتش مستريح , يمكن عشان كتر كلامه عن العيله دي وبالذات عن بنتهم الكبيره مريم , وكمان انه كان بيقعد يوصفلى قد ايه هى دماغها متفتحه وانها دماغها قريبه لدماغه , حسيت من كلامه انه هيقع فى الممنوع ويحبها.
نظرت له فى تعجب
رد على النظره وقاللى:
عارف قصدك اه انا متفتح ومتقبل للاخر, ومتقبل الاختلاف, بس الجواز بين شاب مسلم مصرى وشابه مسيحيه مصريه يكاد يكون الوصول للكتله الحرجه للقنبلة الذرية , وبالدليل العملى قصة عمر .
قلت له:
طيب ما بتجوزوا فى لندن ايه المشكله
&
جاء رده سريعا :
ماهو ده الى حصل انهم اتجوزوا فى لندن , و كمان احتفظت بديانتها وهو بديانته , وكان واضح من رسايله اللى بعد كده انهم متفاهمين اوى بالرغم من اختلاف ديانتهم , وانها بتساعده على اداء فروضه الدينيه وبيقولى انها كانت بتصوم معاه فى رمضان كمان .
بالمناسبة انا زرتهم مره فى لندن لما سافرت اعمل العملية بتاعتى لقيت بيتهم حاجه زى مجمع اديان , مثلا معلقين صور لآيات من القران وصور للسيد المسيح والسيده مريم.
كان واضح اوى التناغم الى عايشين فيه .
وكمان زاد على ذلك ان والد مريم كان منفتح ذهنيا وتقبله وسعادته بالوضع و ده تقريبا لطول اقامته فى الخارج ,ولكن والدتها كنت اشعر بشيىء من الضيق من هذا الوضع وكان باين انها متعصبه نوعا ما ,كان عمر بيوصفلى الكلام ده وبيقولى انه شكله شغل حموات مش اكتر .
قطع حديثه المشاريب
سألت بعد ما القهوجى مشى:
طيب ايه المشكله؟؟؟؟ اهل عمر مثلا
رد عمه :امممممممم بص يا سيدى والد عمر متوفى من وهو فى الجيش , والدته ست طيبه وعلى نيتها من الناس بتوع زمان الطيبين دول , وكانت مريم لما تنزل اجازة كانت والدته بتعاملها زى بنتها واكتر وده انا لمسته بنفسى فى كذا موقف كانت بتيجى على عمر لصالحها.
اما المشكله الحقيقه كانت فى عمه الى كان عايش فى الخليج....ورجع فى نفس توقيت عودة عمر ومريم وابنهم ابراهيم.
وظهرت المشكله دي فى اول لقاء بين مريم وعمه ....كان جاف اوى فى مقابلتها, بس هى ما حتيطش فى دماغها.
بعد رجوع عمر بحوالى ست شهور كان قاعد معايا هنا على القهوة واتصل بيه عمه وقاله عاوزك ضرورى واداه عنوان فندق من الفنادق الفخمه وقاله تجيلى هناك , استاذن عمر منى وذهب , فى تانى يوم حكى لى الى حصل معاه فى المشوار ده , وازاى ان عمه طلع واصل ويعرف امير من امراء الخليج وان الامير ده قرر بناء جامعه خاصه فى مصر وعرض عليه يكون عميد الجامعه لخبرته الواسعه فى التدريس اللى اكتسبها من انجلترا , بصراحه استغربت العرض بس قلت اكيد ان وسطة عمه هى الى السبب.
مرت الايام وبدأ عمر فى البحث عن طاقم تدريس و وتخليص الاجراءات الخاصه بانتقاله للعمل الخاص , لانه كان فى بعثه والدوله هى الى كانت صارفه عليه, فمن الصعب انه يسيب التدريس فى الجامعات الحكوميه بسهوله زى ما انت عارف .
كان مشغول فى تلك الفترة وبالرغم من كده كان لازم يقعد معايا فى القهوة على الاقل مرتين فى الاسبوع , بعد فترة تم افتاح الجامعه مع بداية العام الدراسى الجديد وكانت عامله اسم لانها من اوائل الجامعات الخاصه وكمان اتعرف ان صاحبها خليجى فزاد الاقبال عليها لان فى الوقت ده كان باين اوى اننا بننجرف ناحية الشرق وافكاره وبالذات القادمه من الخليج ولقيته رفع صوابع ايديه وعمل قوسين بيهم وقال : (ما يسمى برياح الشرق).
بعد افتتاح الجامعه قلت زيارت عمر لى بالقهوة ولكننا كنا على تواصل عن طريق التليفون...وعرفت كمان انه دلوقتى بقى من المقربين للامير...مرت اعوام قليله وعلاقته بعمر مستمره عن طريق التليفون او القهوة ,بس الغريب انه سافر فى اجازة من الاجازات الى الخليج مع عائلته , مع انه كان متعود يقضى اجازاته فى لندن , الاغرب بقى انه رجع بنى ادم تانى وده وضح فى اخر قعده قعدناها على القهوة هنا.
كلامه كان مش معقول ما افتكرش ان الافكار الى عرضها عليا فى اليوم ده نتيجة الاجازة الى قضاها فى الخليج اكيد ده تراكم الكام سنة الى فاتت.
"خالى قاللى الكام جملة ديه وتقريبا كان بيكلم نفسه لانه راح فى عالم تانى"
فسالته فى فضول:
قالك ايه
وكأنى انتزعته من غيبوبه افكار:
قالى ان قعدتنا على القهوة دي حرام واننا كده بنعوق الطريق وكنت لسه هرد عليه قالى انه هيعرض على مريم الاسلام ولو رفضت هيطلقها وياخد ابنه منها.
قال الكلام ده وقام مشى مستناش حتى مني الرد.
ومن يومها وهو مش بيستنى مني رد............
ده الجزء اللى انا شفته وشاركت فى احداثه
"قالها خالى وهو بيسحب نفس من الشيشه وبينفخه فى الهوا - كأنه بركان ينفجر ويطلق ابخرته - ,
حسيت بانه مش بيحكى من باب التسامر ولكنه من التفريج على النفس.
وكمل بعد ماخمد البركان ..
بعد كده بدأت اسمع اخباره من والدته او من الاعلام , ماهو بقى مشهور, الاول بسبب الجامعه وبعد كده بسبب حياته الخاصه.
الاول روجوا لفكرة التعايش والتناغم بين افراد الاسره الواحده المنتمين لديانتين مختلفتين والى بيعبر عن روح التعايش فى مصر والمسئولين يستشهدوا فى كل مكان بالعيله ديه.
بعد كده حصلت مشكلة فى بلد شقيق لنا وادبسنا فى حرب جديده, وده طبعا لازم ينعكس علينا وقتها طلبة الجامعات ابتدوا يتظاهروا ضد الحرب دى وعشان نغطى على كل مشاكلنا الخارجيه والداخليه لازم نشغل الناس بقضيه تانيه....اتسرب خبر ان عمر بيحاول يقنع زوجته بالاسلام ...جات ام مريم من لندن وابتدت المشاكل وكل ده فى وقت قياسى .
كانت مش بتسيب تلفزيون او صحيفه الا وتطلع تجرح فى عمر وطبعا كان بيدعمها ناس فى كده معروفين انهم بالعبهم فى المنطقه ديه تحت اسم الدفاع عن الأخوة المسحين فى مصر والعكس احيانا يقفوا مع الطرف التانى على حسب المصلحه , والحقيقه انهم مكنش عاجبهم حالة الالفه الى واضحه على الزوجين واللى كانت فيها مصر كمان .
وللاسف طلع عمر و رد هو كمان فى الاعلام بعد ما اقنعه بكده الامير وقال انه هيطلب منها انها تدخل الاسلام,
كان رد الكنيسه قوى وطلبت من مريم طلب الطلاق واقنعوها انهم هيستخدموا علاقتهم عشان يهربوا ابنها ابراهيم معاها.
وكالعاده فى مصر تحول الامر لأزمة, والكل يقول انه على صواب والتانى على غلط وناس تنفخ فى الحريق من هنا وناس تنفخ من هناك.........وناس فرحانه بالنار وتتمنى استمرارها وفرحانين اوى ان فى مشاهدين كتير للمسرحيه وكمان منبهرين ومنشغلين فى احداث فصولها .
سكت لحظه وضرب كوباية المايه الى قدامه....وقالى الغبى عمر ومراته مريم انجرفوا فى المسرحيه وعجبتهم اوى ادوار البطوله و ان كل واحد نجم فى فريقه وانفصلوا , ونجحت مريم فعلا فى انها تهرب هى وابنها خارج البلاد بمساعدة بعض المهمين فى البلد اللى فى مصلحتهم ان الماتش او المسرحيه شوف انت المسمى الى يعجبك تستمر.
طلع عمر واعلن الى حصل, ثار الناس وبدات فعلا احداث فتنه, وعرفت من ام عمر ان الامير الخليجى وعده انه هيرجع له ابنه وانه يعرف شباب بيحب الجهاد فى سبيل الله وانه بيعتبر ان رجوع ابن مسلم لأبيه المسلم وبعده عن السيده المسيحيه ده نوع من انواع الجهاد فى سبيل الله , فى الوقت ده انا كنت على تواصل بمريم وكذلك ام عمر وكانت بتسمحله انه يكلم جده فى التليفون وعرفت جدته انه بيصلى ويصوم كمان , بس عمر مكنش يعرف بالمكالمات ديه.
بعد بدء الفريق الاخر بزيادة نار الفتنه اكتر"امها بدأت تطلع فى الصحف وتقول ان حفيدها لا يمكن يكون مسلم وبدأت التجريح فى المسلمين".
وطبعا جماعة محبيى الجهاد مش هتسكت والامير الى بيدعمها مش هيسكت نصح عمر باستخدام العنف وقاله انه هيخلى الجماعة تعمل عملية فى قلب لندن ترجع بيها ابنه
والغبى وافق وهو مش عارف ان الأمير عنده اغراض تانيه وافكار هدامه عاوز ينفذها وكان عاوز يقتل ام مريم اعتقادا منه انه بكده رجع شرف الامه الاسلاميه والقصاص هو الحل وكمان كان عاجبه دور القائد, زائد انه كان حاقد على اننا فى البلد دي (كنا) عايشين عادى كده باختلافتنا فى سلام وموده.
تمت العملية
وابراهيم رجع هو وامه وجده
بس فى توابيت
ومازالت ام مريم والامير عايشين .........
سكت خالى وتركنى فى صدمتى وتفكيرى وحيرتى فى الطبيعه البشريه التى تسير عكس المنطق....المنطق بيقول ان ربنا خلق الدين وده شيء جميل وخلق الحب وهو شيىء جميل ايضا يعنى يتفقوا مع بعض ومن المستحيل التعارض بينهم.....ولكن هذه القصه اثبتت ان الطبيعه البشريه العكس واننا بلا عقل وبلا منطق .
بس كان لازم اسأل
انت كنت فين يا خالى ماحولتش ليه تقف ضد الناس ديه وتستخدم علاقتك الصداقه بينك وبين عمر؟؟؟؟
ظل الصمت الى ان كسره صوت رجل يلعب الشطرنج فى الركن البعيد من القهوة مع نفسه اتضح انه مر من صوته
ولقيته بيقول:
كش ملك يا............
__________________________________________________________________
* مش عارف ليه النهارده بالذات وانا نازل المسيرة طق فى دماغى ادور على الاسكتش الى كاتب فيه النوتس بتاعتى , وبالذات الى كتبتها قبل احداث الثورة , يمكن افتكرت الموضوع الى كنت كاتبه عن خالى وعمر , اهه لقيت الموضوع كنت مسميه حتى كش ملك يا...., ههههههههههههه يخربيت الجبن انا كنت عايز اقول كش ملك يا حسنى بس خوفت وقتها اكتبها , اخوانا البعده ماعندهومش هزار هيجبونى من قفا امى واخوها .
* على العموم تقريبا الى بيحصل النهارده فصل من فصول قصة عمر, و انا نازل اكفر عن ذنب خالى الى ما عملش حاجة زمان عشان يمنع الغباوة المتأصلة فى شعبنا مع انه كان يقدر يعمل حاجه ....الله يسامحك ياخال .
* هههههههههههههههههههههه تقريبا نفس السيناريو المتكرر كل ما انزل مسيرة , مظاهرة ,اعتصام , على باب الشقة ماما تحدفلى الشنطة – الى بنساها دايما –وتقولى اتفضل عدة النصب قصدى عدة الشغل الكوفيه والبيبسى فيها وازازة الماية كمان , وبابا يجى يكمل بنفس الجملة الى مش بتتغير من الحوار :
انت بقيت مدمن ولازم تتعالج من موضوع النزول فى المظاهرات ده , ويضحك وهو بيقول الله يخربيتكم مليتوا البلد .
* يجى دورى وبقعة النور تتوجه ليا فى المسرح المظلم.... اكرر جملتى فى الحوار انا كمان عشان ما يحصلش خلل فى النص:
ياحاج ده مش ادمان , ده كان كبت بعيد عنك الواحد كان عنده كبت فى التعبير عن رأيه وكان هيفرقع , ادعيلى انت والحاجه بس .
* ابوس ايد ابويا و أمى واتوكل .
* طبعا انتم هتقولوا عاليا مجنون وانا قاعد اكتب وانا مستنى المسيرة تبتدى , لا اقولكم على موهبة بقى مش عند حد انا بكتب وانا ماشى فى المسيرة كمان, حابب اسجل كل حركة وكل كلمة وكل هتاف كمان , حابب انى اسجل كل الاحداث قصدى التاريخ الى بيحصل , احنا بنصنع التاريخ ياجدعان ومش عايز حد يوسخه او يدلسه بافكار انا بكتب اللى بشوفه واللى بيحصل .
تقمص شخصية مؤرخ الصورة هوريدوت يناير , بس هو عمنا هورو كان خطه وحش كده , ياله بقى انا بكتب وانا فى وسط الهوجه دي لوحدها معجزة .
* بدأت المسيرة اهو من عند شبرا اخوانى المسحيين اتجمعوا من معظم الكنايس المنتشرة فى شبرا, واصحابى حواليا , المسيرة من الواضح انها بتضم عدد مش صغير من المسلمين واضح ان فى محجبات كتيره كمان فى المسيرة .كنت مفكر ان محدش كتير هيشارك فى مسيرة مسحيين وهيقولوا دي مطالب فئوية والكلام ده, واعتقد انى انا وخالد واسلام بس الى هنكون موجودين .
* المسيرة تقريبا عددها يتجاوز العشرة آلاف , بقيت خبير فى التقدير كمان من كتر المرمطه فى المظاهرات .
الاجواء تحفة والهتافات برده اينعم بتبقى فى هتافات دينية كل حبتين بس ده من حقهم برده .
بس فى هتافات بتخلينى طاير فى السما فوق مع انها بسيطه جدا بالذات لما بلاقى ابونا بيرددها هو كمان منها مثلا
"فكك فكك من الطائفيه...... مصر هى القضية "
"مسلم ومسيحى ايد واحده " .
* اوقات بفكر هو انا مدمن مظاهرات فعلا عشان انزل فى مظاهرة مسحيين , بس الحمد الله الرد بيجى بسرعه من جوايا انى اخدت عهد على نفسى انى هنزل فى اى مظاهره اواعتصام يكون فيه حق لحد , والمره ديه اخوانا المسحيين معاهم حق يعنى ايه لمؤاخذه كل شوية تتهد لهم كنيسة... يا عينى عليك لما تفوق من العنصرية الى جواك وتفتكر العنصرية ديه عملت ايه ووصلت عمر لايه .
*غنوة حلوة وغنوتين حلوة يا بلدى , املى كان انى يا بلدى....... والله ما انا فاكر بقيت الاغنية بس نطت فى دماغى وانا شايف المنظر وقررت اكتبها ما يخسرش .
* انا دلوقتى فى اخر المسيرة قعدت شوية على الرصيف اكتب وخالد واسلام كملوا وهيحكولى اول ما اوصلهم عند ماسبيروا على التفاصيل عشان اكتبها ..
* وصلت متأخر مش عارف اكتب منظر الدم مخلينى مشلول بدوّر على خالد واسلام مش لاقيهم يااااااااااااارب يااااااارب, المنظر مش عارف جثث مرمية فى كل حته, مش عارف ارتب الكلام مش عارف اكتب........
ايوه انا وصلت ماسبيروا متأخر الكتابه اخديتنى سمعت بيقولوا ناس ضربت نار على الجيش والجيش ضرب نار ......لا بيقول الجيش دهس الناس من غير ضرب نار مين ضرب مين مين عمل ايه ايه الدم ده كله حرااااااااام فى شرع مين ؟؟؟؟؟؟
* خالد اهه الحمد الله جاى عليا
فين اسلام يا خالد ايه الى حصل؟؟؟؟؟
خالد بيقولى انت بتكتب ايييييييييه انت اتعبطت ده وقته
هو ده وقته يا خالد , اسلام فين اسلام فين يا ابنى انت؟؟؟
مايعرفش ازاى؟؟ وقت الضرب اختفى من جنبه ازاى؟؟؟
يوم 28 الضرب كان اكتر من ده وماتهزيتش كده ليه مش عارف مش متوقع ان ده يحصل مش عارف مين معايا ومين ضدى ؟؟؟
* احكى ياخالد الى حصل وحيات ابوك , قولى جيشنا ضرب علينا نار بجد؟؟؟ جيشنا دهس الناس ؟؟؟؟؟ما ترد يا ابنى الى دهس الناس امن مركزى ولا مدرعات جيش الناس ديه بيكدبوا ويقولوا مدرعات جيش رد؟؟؟
قول يا خالد
*وش خالد اتغير و قا
---------------------------------------------------------------------
1- مش انا الى كاتب النوتس ديه لقيتها متلقحه على رصيف مواجه لماسبيرو , وكان من الصعب انى ادور على صاحبها فى المجزرة الى كنا فيها .
2- الخيط الى قدرت اوصله واتقطع هو عمر المغربى وعرفت انه استشهد يوم 28 على ابواب مبنى امن الدولة , وهو بيحاول اقتحامه مع المتظاهرين بعد ما اضرب عليهم نار منه .
3- اتمنى انى اكون نقلت ليكم النوتس بالظبط لأن الخط كان وحش اوى الا الجزء الاولانى الى بعنوان كش ملك كان واضح ومرتب .
4- فى الجزء الخاص برد خالد على سؤال الكاتب عن الجيش هل ضرب نار على الشعب المصرى ولا ؟؟؟
* للاسف فى هذا الجزء كانت الورقة ملطخة بالدماء .
نقلها لكم :
يوسف جورج رزق
الى جنة الخلد يا مينا
